Microsoft Surface Go 3

ഹൈലൈറ്റ്:

• മൈക്രോസോഫ്റ്റ് സർഫേസ് ഗോ 3യുടെ അടിസ്ഥാനന പതിപ്പ് ഇന്റൽ പെന്റിയം ഗോൾഡ് പ്രോസസറിലും വാങ്ങാം.
• അടിസ്ഥാന മോഡലിന് 57,999 രൂപയാണ് വില.
• ഏറ്റവും വിലയുള്ള ഇന്റൽ കോർ i3 പ്രോസസർ, 8 ജിബി റാം, 128 ജിബി എസ്എസ്ഡി എന്നിവയുള്ള മോഡലിന് 62,999 രൂപയാണ് വില.

മൈക്രോസോഫ്റ്റ് ഈ വർഷം അവതരിപ്പിച്ച പുതിയ ഓപ്പറേറ്റിംഗ് സിസ്റ്റം, വിൻഡോസ് 11 പ്രീ-ഇൻസ്റ്റാൾ ചെയ്ത ആദ്യ 2-ഇൻ-1 വേർപെടുത്താവുന്ന ടാബ്‌ലെറ്റ് കമ്പ്യൂട്ടർ, സർഫേസ് ഗോ 3 ഇന്ത്യൻ വിപണിയിലെത്തി. സെപ്റ്റംബറിൽ സർഫേസ് ലാപ്‌ടോപ്പ് സ്റ്റുഡിയോ, സർഫേസ് പ്രോ 8, സർഫേസ് ഡ്യുവോ 2 എന്നീ ഡിവൈസുകൾക്കൊപ്പമാണ് മൈക്രോസോഫ്റ്റ് സർഫേസ് ഗോ 3 അവതരിപ്പിച്ചത്. നിലവിൽ വില്പനയിലുള്ള സർഫേസ് ഗോ 2 ടാബ്‌ലെറ്റ് കമ്പ്യൂട്ടറിൻ്റെ പിൻഗാമിയായ സർഫേസ് ഗോ 3യ്ക്ക് പത്താം തലമുറ ഇന്റൽ കോർ ഐ3 പ്രോസസറിലൂടെ 60 ശതമാനം മികച്ച പ്രകടനം നടത്താൻ സാധിക്കും എന്നും മൈക്രോസോഫ്റ്റ് അവകാശപ്പെടുന്നു.

മൈക്രോസോഫ്റ്റ് സർഫേസ് ഗോ 3യുടെ അടിസ്ഥാനന പതിപ്പ് ഇന്റൽ പെന്റിയം ഗോൾഡ് പ്രോസസറിലും വാങ്ങാം. പത്താം തലമുറ ഇന്റൽ പെന്റിയം ഗോൾഡ് പ്രൊസസർ, 8 ജിബി റാം, 128 ജിബി എസ്എസ്ഡി എന്നിവ ഉൾപ്പെടുന്ന കോൺഫിഗറേഷന് 57,999 രൂപയാണ് വില. കൂടാതെ മുൻകൂട്ടി ഓർഡർ ചെയ്യുന്ന ഉപഭോക്താക്കൾക്ക് 9,699 രൂപ വിലയുള്ള സർഫേസ് പെൻ സൗജന്യമായി ലഭിക്കും.

Microsoft Surface Go 3
ബിസിനസ് ഉപഭോക്താക്കൾക്ക് സർഫേസ് ഗോ 3യുടെ 4 ജിബി റാമും, 64 ജിബി ഇഎംഎംസിയും, പത്താം തലമുറ ഇന്റൽ പെന്റിയം ഗോൾഡ് പ്രോസസറുമുള്ള പതിപ്പ് 42,999 രൂപയ്ക്ക് ലഭിക്കും. പത്താം തലമുറ ഇന്റൽ കോർ i3 പ്രൊസസർ, 4 ജിബി റാം, 64 ജിബി ഇഎംഎംസി എന്നിവയുള്ള പതിപ്പ് അതെ സമയം 47,999 രൂപയ്ക്ക് ലഭ്യമാണ്. ഏറ്റവും വിലയുള്ള ഇന്റൽ കോർ i3 പ്രോസസർ, 8 ജിബി റാം, 128 ജിബി എസ്എസ്ഡി എന്നിവയുള്ള മോഡലിന് 62,999 രൂപയാണ് വില.

സർഫേസ് ഗോ 3

മൈക്രോസോഫ്റ്റ് അതിന്റെ ഏറ്റവും പുതിയ ഓപ്പറേറ്റിംഗ് സിസ്റ്റം, വിൻഡോസ് 11, സർഫേസ് ഗോ 3-യിൽ പ്രീലോഡ് ചെയ്തിട്ടുണ്ട്. ഹാർഡ്‌വെയറുകളുടെ കാര്യത്തിൽ സർഫേസ് ഗോ 3 ഏറെക്കുറെ സർഫേസ് ഗോ 2വിന് സമാനമാണ്. 3:2 വീക്ഷണാനുപാതമുള്ള 10.5 ഇഞ്ച് ടച്ച് ഡിസ്‌പ്ലേ, മുന്നിലും പിന്നിലും 1080p ക്യാമറകൾ, ഡോൾബി ഓഡിയോ സൗണ്ട് സിസ്റ്റം, മികച്ച വീഡിയോ ചാറ്റിംഗ് അനുഭവത്തിനായി സ്റ്റുഡിയോ മൈക്രോഫോണുകൾ എന്നിവയാണ് മൈക്രോസോഫ്റ്റ് സർഫേസ് ഗോ 3യുടെ സവിശേഷതകൾ.

സർഫേസ് ഗോ 3 ഓപ്‌ഷണൽ എൽടിഇ അഡ്വാൻസ്‌ഡുമായാണ് വില്പനക്കെത്തിയിരിക്കുന്നത്. വേഗതയേറിയ കണക്റ്റിവിറ്റി സപ്പോർട്ട് ഇത് പ്രധാനം ചെയുന്നു. ടച്ച്പാഡിനൊപ്പം വേർപെടുത്താവുന്ന കീബോർഡായി പ്രവർത്തിക്കുന്ന സർഫേസ് ഗോ സിഗ്നേച്ചർ ടൈപ്പ് കവറും പുത്തൻ ടാബ്‌ലെറ്റ് കംപ്യൂട്ടറിനെ പിന്തുണയ്ക്കുന്നു.